د سند حکومت ایم کیو ایم ته پر شاهراه فیصل د غونډې اجازه ورنه کړه

کراچۍ (وېب نیوز) د سند حکومت متحدې قومي موومنټ پاکستان ته د نومبر پر ۲۹مه په کراچۍ کې پر شاهراه فیصل د غونډې کولو اجازه نه ده ورکړې. ایم کیو ایم د نویو صوبو د جوړېدو په ملاتړ د یادې غونډې اعلان کړی و. د سند د اطلاعاتو وزیر شرجیل انعام مېمن ویلي چې سیاسي ګوندونه باید د خپلو فعالیتونو لپاره قانوني اجازه واخلي او پر شاهراه فیصل د غونډې اجازه به ورنه کړل شي. هغه وویل چې ټول ګوندونه د اساسي قانون او قانون په چوکاټ کې سیاسي فعالیتونه کولای شي، خو حکومت به د نښتو او ګډوډۍ اجازه ورنه کړي. نوموړي د ایم کیو ایم پر مشرانو نیوکې هم وکړې او ویې ویل چې د صوبو په اړه د سند اسمبلۍ خپله پرېکړه کړې ده.