کوټه (سید سردار محمد خوندۍ)
د ډپټي کمشنر دفتر جنګل پیر علیزي کې د صوبایي د کورنیو چارو وزیر میر ضیاء لانګو په مشرۍ کې د ضلع قلعه عبدالله د عمومي امن و امان صورتحال او د میزئی اډې په ځای کې د روان پرلت په اړه یوه مهمه لوړه کچه غونډه ترسره شوه.
په غونډه کې د عوامي نیشنل پارټۍ مرکزي مشر او پارلیماني لیدر انجینر زمرک خان اچکزي، د اربن پلاننګ پارلیماني سیکرټري او د کوټه ډیویلپمنټ اتهارټۍ چیئرمین اسفندیار خان کاکړ، صوبایي وزیر صحت بخت محمد کاکړ، کمشنر پشین ډویژن قایم لاشاري، ډي آئي جي پولیس، ډپټي کمشنر قلعه عبدالله منور حسین مګسي، ډسټرکټ پولیس آفیسر خلیل احمد بګټي او د پاکستان پیپلز پارټۍ صوبایي جنرل سیکرټري رباني خان کاکړ په ګډون نورو لوړو ملکي او پولیس چارواکو ګډون وکړ.
په غونډه کې د ضلع قلعه عبدالله د ټولیز امن و امان وضعیت، په سیمه کې د خلکو د ستونزو، د میزئی اډې په ځای کې د روان پرلت او د مظاهره چیانو د غوښتنو په اړه په تفصیل سره غور او خبرې وشوې. په دې موقع د پرلت له امله رامنځته شوي وضعیت، خلکو ته د پیښو ستونزو او د مسلې د سوله ییز حل لپاره په بیلابیلو چارو غور وشو.
د صوبایي کورنیو چارو وزیر میر ضیاء لانګو په مشرۍ کې په جوړه شوې غونډه کې اړوند چارواکو له لوري د ضلعې د اوسني وضعیت او انتظامي او امنیتي چارو په اړه د نظر تبادله وشوه، په داسې حال کې چې د پرلت مسله د پوهاوي او مذاکراتو له لارې د حل کولو په اړه هم غور روان وو.
غونډه په ضلع کې د امن و امان د ښه والي، د خلکو د ستونزو د هواري او د ژوند د معمولاتو د بحالۍ لپاره یو مهم پرمختګ ګڼل کیږي.
