چمن کې له ۴ کلنې نجلۍ سره د ۶۰ کلن سړي د مبینې نکاح مرکزي تورن افغانستان ته تښتېدلی، پلار او ورور یې نیول شوي

چمن (ویب نیوز) په چمن کې له یوې ۴ کلنې نجلۍ سره د ۶۰ کلن سړي د مبینې نکاح په قضیه کې پولیسو د نجلۍ پلار او د تورن ورور نیولي، په داسې حال کې چې د قضیې مرکزي تورن صلاح الدین د افغانستان پر لور تښتېدلی بلل کېږي. پولیس وايي، د تحقیقاتو پر مهال معلومه شوې چې د ۴ کلنې نجلۍ د مبینې نکاح قضیه د هغې د ۱۴ کلنې خور شکریه بي بي له وژنې سره هم تړاو لري، چې د سپتمبر په ۷مه وژل شوې وه. د پولیسو په وینا، د شکریه بي بي خاوند د هغې د وژنې په تور مخکې نیول شوی او نوموړی د هغه ۶۰ کلن سړي زوی دی چې له ۴ کلنې نجلۍ سره یې د مبینې نکاح موضوع راپورته شوې ده. د نجلۍ نیول شوي پلار ویلي چې د هغه ۱۴ کلنې لور په خسرګنۍ کې له مبینې تشدد سره مخ وه او پر هغې د خپلې کم عمرې خور د واده لپاره هم فشار اچول کېده. د پلار په وینا، تېره میاشت د ۴ کلنې لور د واده خبرې له ۶۰ کلن صلاح الدین سره د ۲۵ لکو روپیو په بدل کې شوې وې، خو د پیسو له ورکړې مخکې صلاح الدین د ۴ کلنې پر ځای د ۸ کلنې لور د واده غوښتنه وکړه او د دې غوښتنې له ردولو وروسته یې ۱۴ کلنه واده شوې لور شکریه بي بي د سپتمبر په ۷مه په کچلاک کې په مبینه توګه د تشدد له لارې ووژل شوه. پولیس وايي، د دواړو پېښو په تړاو د نورو کسانو د ښکېلتیا په اړه تحقیقات روان دي او د کم عمرې نجلۍ د ساتنې او قانوني اقدام لپاره هم ګامونه اخیستل کېږي.