د اړینو توکو د بیو لوړوالي په اړه د احسن اقبال اندېښنه

کوټه (ویب نیوز) د پلان جوړونې وفاقي وزیر احسن اقبال د اړینو توکو د بیو پر لوړوالي اندېښنه څرګنده کړې او صوبايي او ضلعي ادارو ته یې سپارښتنه کړې چې د خوراکي توکو بیې په اغېزمن ډول وڅاري او د زېرمه کولو او ناجایزه ګټې اخیستنې پر ضد اقدامات وکړي. نوموړي په اسلام اباد کې د ملي بیو د څارنې کمېټې د غونډې مشري وکړه او د عمده او پرچون بیو ترمنځ د غیرضروري توپیر د له منځه وړلو او د تېلو د بیو له لوړوالي وروسته د ترانسپورټي کرایو د زیاتوالي د ارزونې لارښوونه یې وکړه. احسن اقبال وویل، په نړیوال بازار کې د ډي اې پي د بیې د کمېدو ګټه باید بزګرانو ته ورسېږي، او د غوړو، خوراکي تېلو او لبنیاتو د بیو د لوړوالي د لاملونو معلومولو لپاره دې د یوې اوونۍ په موده کې د پلټنې راپور وړاندې شي.