د بلوچستان اداره له کوټې څخه چلول لوی انتظامي ننګونه ده، سرفراز بګټی

اسلام‌اباد، کوټه (ویب نیوز) د بلوچستان اعلی وزیر میر سرفراز بګټي ویلي، د صوبې د پراخې جغرافیې او ستونزمنو لارو له امله یوازې له کوټې څخه د بلوچستان اداره چلول لویه ننګونه ده. نوموړي د انتظامي ستونزو د حل لپاره د نویو انتظامي واحدونو، پیاوړي بلدیاتي نظام او اضافي سرچینو پر اړتیا ټینګار وکړ. د صنوبر فاونډېشن تر سیوري لاندې د پاکستان د انتظامي تنظیم او نویو صوبو جوړولو په اړه یوې ملي غونډې ته په وینا کې هغه وویل، د انتظامي اصلاحاتو بحث باید پارلمان ته یووړل شي او د سیاسي ګوندونو ترمنځ پراخ توافق رامنځته شي. د هغه په وینا، په بلوچستان کې د ډویژنونو شمېر له اتو څخه ۱۲ ته او د ضلعو شمېر له شاوخوا ۳۶ څخه ۴۱ ته لوړ شوی دی. نوموړي وویل، د سرچینو په وېش کې باید د نفوس ترڅنګ جغرافیایي پراخوالي، انتظامي اړتیاوو او خلکو ته د دولتي خدمتونو رسېدو ته هم پام وشي. هغه د بلدیاتي ادارو لپاره د سرچینو برابرولو، د بلدیاتي ټاکنو ترسره کولو او د پارلمان د غړو د قانون جوړونې پر چارو د تمرکز کولو غوښتنه هم وکړه.