په ټول هېواد کې د حکومتي او بازاري بیو ترمنځ لوی توپیر؛ ګراني زیاته شوې

کوټه (ویب نیوز) په ټول پاکستان کې د حکومتي نرخونو او د دوکاندارانو د پلور بیو ترمنځ لوی توپیر رامنځته شوی او د مایع ګاز، اوړو، دالونو، چرګانو، غوښې او شیدو د بیو د خپل‌سري لوړوالي شکایتونه راپورته شوي دي. د کراچۍ، لاهور، اسلام‌اباد، راولپنډۍ، پېښور او کوټې په ګډون په ګڼو ښارونو کې د مایع ګاز بیه په هر کیلو کې ۶۰۰ روپیو ته رسېدلې، په داسې حال کې چې د کورني ګاز سلنډر بیه ۷ زره روپیو ته نږدې شوې ده. په لاهور کې د مایع ګاز حکومتي بیه په هر کیلو کې ۲۸۰ روپۍ ده، خو دوکانداران یې په ۵۵۰ روپیو پلوري. په کراچۍ کې د چرګانو غوښه په هر کیلو کې ۷۵۰ روپۍ او په کراچۍ او لاهور کې اوړه په ۱۹۰ روپیو پلورل کېږي. په کوټه کې د ۲۰ کیلو اوړو د بورۍ بیه ۳ زره او ۳۳۳ روپیو ته رسېدلې، خو په خضدار، چاغي، واشک، کېچ او نورو ولسوالیو کې د ۵۰ کیلو اوړو د بورۍ بیه له ۸ زره روپیو لوړه شوې ده. په بلوچستان کې د غنمو بحران هم سخت شوی دی. د سرچینو په وینا، صوبایي حکومت د ۵ لکه او ۷۵ زره بورۍ غنمو د پېرلو منظوري ورکړې وه، خو تر اوسه یوه لک بوجۍ هم نه دي پېرل شوې. په کوټه کې د سبزیو، غوښې او شیدو بیې هم تر ۲۰ سلنې پورې لوړې شوې دي.