د غږیز پیغام افشا کېدل؛ علي امین ګنډاپور پر سلمان اکرم راجا نیوکه وکړه

کوټه (ویب نیوز) د پاکستان تحریک انصاف ګوند د مشر او د خیبر پښتونخوا پخواني اعلی وزیر علي امین ګنډاپور یو منسوب غږیز پیغام د ګوند د پارلماني ډلې په واټس‌اپ ډله کې خپور شوی، چې پکې نوموړي د ګوند پر عمومي منشي سلمان اکرم راجا نیوکه کړې او د هغه د څرګندونو پر موخه یې پوښتنې راپورته کړې دي. ګنډاپور ویلي، که د پارلماني ډلې غونډې ته په وار وار بلنه ورکول کېږي، نو سلمان اکرم راجا او بیرسټر ګوهر دې هم غونډې ته حاضر شي. هغه د ګوند د اوسني وضعیت، د حکومت د پای ته رسېدو او د صوبې د حالاتو پړه پر اړوندو مشرانو اچولې او ویلي یې دي چې د لا زیات ابهام رامنځته کول د ستونزو حل نه دی. د پخواني اعلی وزیر ویاند فراز مغل دغه غږیز پیغام علي امین ګنډاپور ته منسوب کړی دی. بل لوري ته، د تحریک انصاف مشر افتاب عالم د سلمان اکرم راجا پر څرګندونو خواشیني ښودلې او ویلي یې دي چې د حساسو موضوعاتو په اړه له څرګندونو مخکې باید حقایق په بشپړه توګه وڅېړل شي. د هغه په وینا، په پارلماني غونډه کې د اعلی وزیر د نومولو یا د صوبایي مشر د بدلون پرېکړه نه وه شوې، خو په خبرو اترو کې د خیبر پښتونخوا د صوبایي پارلماني ډلې د اغېزمنې استازولۍ پر ډاډ ورکولو موافقه شوې وه.