پاکستان، ترکیې، قطر او اندونیزیا د دفاعي صنعتي همکارۍ تفاهم‌لیک لاسلیک کړ

کوټه (ویب نیوز) پاکستان، ترکیې، قطر او اندونیزیا د دفاعي همکارۍ د پیاوړتیا او ستراتیژیکې ملګرتیا د پراختیا لپاره د «بدر» په نوم تفاهم‌لیک لاسلیک کړ. د ترکیې د دفاع وزارت په وینا، د څلورو هېوادونو دفاعي وزیرانو او اړوندو چارواکو د قطر په پلازمېنه دوحه کې دغه تفاهم‌لیک لاسلیک کړ. د پاکستان له لوري د دفاع وزیر خواجه محمد آصف، د ترکیې د دفاع وزیر یاشار ګولر، د قطر مرستیال لومړي وزیر او د دفاعي چارو دولتي وزیر شیخ سعود بن عبدالرحمان بن حسن الثاني او د اندونیزیا د دفاع وزارت مرستیال یوسف جوهري لاسلیکونه وکړل. د دغه تفاهم‌لیک موخه د دفاعي تولید، پوځي وړتیاوو، تخنیکي روزنې، څېړنې او پرمختیا په برخو کې د همکارۍ پراخول، د عصري دفاعي نظامونو په جوړولو کې ګډ کار او د څلورو هېوادونو د دفاعي صنعتونو پیاوړتیا ده. د ترکیې د دفاع وزارت په وینا، دغه همکاري به د دفاعي تولید وړتیا لوړه کړي، د هېوادونو ترمنځ همغږي زیاته کړي او د دوستو هېوادونو دفاعي اړتیاوو ته د ځواب ویلو په برخه کې به مرسته وکړي.