په بلوچستان کې د سرداري نظام د ختمولو قانون شته، خو پر عملي کېدو یې پوښتنې

کوټه (وېب نیوز) په بلوچستان کې د سرداري نظام د ختمولو لپاره په ۱۹۷۶ کال کې قانون منظور شوی، چې له مخې یې د سردارۍ پر بنسټ د ناقانونه قضايي واکونو کارول، د شخصي زندانونو ساتل، د خلکو ناقانونه بندي کول، په زور کار اخیستل او د سردارۍ په نوم د مالي او مادي ګټو ترلاسه کول منع دي؛ د قانون د سرغړونې په صورت کې تر درېیو کلونو پورې د بند، جریمې یا دواړو سزاوو ګنجایش شته. د سرداري نظام پر ضد د بلوچستان په سیاسي تاریخ کې د سردار عطاالله مېنګل او نواب خیر بخش مري له خوا د پرېکړه‌لیک د وړاندې کولو یادونه هم کېږي، خو د قانون له موجودیت سره سره د هغه د اغېزمن عملي کېدو او د سرغړونو پر وړاندې د قانوني اقدام په اړه پوښتنې لا هم شته.