د اېل پي جي دوه بېړۍ پاکستان ته رسېدلې، د بیو د کمېدو امکان

کوټه (وېب نيوز) له عمان څخه د مایع پټرولیم ګاز (اېل پي جي) لېږدوونکې دوه بېړۍ د پاکستان پورټ قاسم بندر ته رسېدلې دي، چې ورسره په هېواد کې د ګاز د رسد د ښه کېدو او د بیو د کمېدو امکان ښودل شوی دی. د سرچینو په وینا، دواړو بېړیو په ګډه ۷ زره او ۶۰۳ مټریک ټنه اېل پي جي راوړې ده. د اېس اېس جي سي په ترمینل کې د «پریانیس» په نوم بېړۍ ۴ زره او ۲۵۰ مټریک ټنه، او د اېنګرو په ترمینل کې د «الیسا ون» په نوم بېړۍ ۳ زره او ۸۳ مټریک ټنه ګاز ښکته کړی دی. د بازار سرچینې وايي، د ایران له سرحدي لارې څخه د اېل پي جي د درېدلې لېږدونې د بیا پیل امکان هم شته، چې د رسد په ښه کېدو سره د بیو د کمېدو لامل کېدای شي.