ایران ادعا کوي چې د سیستان او بلوچستان د ناامنۍ تر شا دوه عربي هېوادونه دي

کوټه (وېب نیوز) د ایران د پارلمان د ملي امنیت او بهرني سیاست د کمېټې غړي فدا حسین مالکي ادعا کړې چې د ایران په سیستان او بلوچستان ولایت کې د وروستۍ ناامنۍ تر شا د دوو عربي هېوادونو د لاس لرلو نښې شته، خو نومونه یې نه دي څرګند کړي. نوموړي د ایران له ایلنا خبري اژانس سره په خبرو کې ویلي چې سیمې ته د پرمختللو وسایلو او مسلکي کسانو د لېږلو موضوع تر څېړنې لاندې ده. د ایراني رسنیو د راپورونو له مخې، په تېرو څو اوونیو کې په دغه ولایت کې وسله وال بریدونه او نښتې شوې دي چې پکې د پولیسو د سرتېرو په ګډون ګڼ کسان وژل شوي دي. د اکتوبر په ۱۲مه په مهرستان کې په دوو جلا بریدونو کې د ښځینه بسیج ځواکونو یوه قوماندان او یو پولیس وژل شوي وو، په داسې حال کې چې د اکتوبر په ۸مه په زاهدان کې د سړک غاړې د بم چاودنې له امله د پولیسو د قوماندانۍ مرستیال نصرت افتخاري هم وژل شوی و. ایراني چارواکو د دغې ناامنۍ په پېښو کې د بهرنیو عناصرو د احتمالي رول د څېړنې خبره کړې، خو د دوو عربي هېوادونو د لاس لرلو ادعا په خپلواکه توګه نه ده تایید شوې.