د لبنان په ګډون پر ټولو جبهو د جګړې پای ته رسول له امریکا سره د هر ډول هوکړې اساسي شرط دی، اسماعیل بقایي

تهران (وېب نیوز) د ایران د بهرنیو چارو وزارت ویاند اسماعیل بقایي ویلي چې له امریکا سره د هر ډول هوکړې لپاره د لبنان په ګډون پر ټولو جبهو د جګړې پای ته رسول اساسي شرط دی. هغه له خبریالانو سره په خبرو کې وویل چې د ایران غوښتنې روښانه او مشروع دي او تر هغو چې دغه غوښتنې پوره نه شي، په سیمه کې د امنیت د بېرته ټینګښت په اړه خبرې نه شي کېدای. د نوموړي په وینا، د اسلام‌اباد د تفاهم په لومړي بند کې هم د لبنان په ګډون پر ټولو جبهو د جګړې د درولو موضوع شامله وه، چې امریکا یې سرغړونه کړې ده. هغه زیاته کړه چې دغه شرط به په هر ډیپلوماټیک بهیر کې مهم ځای ولري.