د سیمه‌ییز کړکېچ له امله د ۲۰۲۷ کال اسیايي فوټبال جام وځنډول شو

ریاض (وېب نیوز) د اسیا د فوټبال کنفدراسیون اعلان کړی چې په سعودي عربستان کې د ۲۰۲۷ کال اسیايي فوټبال جام د سیمې د کړکېچ، امنیتي اندېښنو، د سفرونو د خنډونو او لوژستیکي ستونزو له امله ځنډول شوی دی. دغه سیالۍ چې د ۲۴ لوبډلو په ګډون یې د ۲۰۲۷ کال د جنورۍ له اوومې د فبرورۍ تر پنځمې پورې د ترسره کېدو پلان و، اوس به د ۲۰۲۷ کال د ډسمبر له ۲۳مې د ۲۰۲۸ کال د جنورۍ تر ۲۱مې ترسره شي. د اسیا د فوټبال کنفدراسیون ویلي چې د نویو نېټو د تایید لپاره به له فیفا سره اړیکه ونیسي. په سعودي عربستان کې د وروستیو بریدونو له امله نورې ورزشي سیالۍ هم لغوه یا ځنډول شوې دي.