اقتصادي خرابۍ، ګراني او بېروزګاري له امله ملي اقتصاد په وینټیلیټر کې دی، ملک سکندر ایډووکیټ

کوټه (وېب نیوز)د جمعیت علماء اسلام مرکزي جوائنټ سیکرټري او پخواني سپیکر اسمبلی ویلي چې په هېواد کې اقتصادي خرابۍ، ګراني او بېروزګاري دومره زیاتې شوې چې ملي اقتصاد د وینټیلیټر په حالت کې دی. نوموړي په کوټه کې ویلي چې د حکومت د خصوصي کولو، ګراني او د نړیوالو مالي ادارو پالیسیو هېواد د تباهۍ پر لور بېولی دی. هغه وویل چې په اوسني وضعیت کې نه یوازې بېروزګاري او ګراني کمه شوې نه ده بلکې نور هم زیاته شوې ده او د ادارو د خصوصي کولو لړۍ روانه ده. د هغه په وینا د آی اېم اېف د پالیسیو له امله د مزدورانو او ملازمینو اقتصادي وژنه روانه ده. ملک سکندر ایډووکیټ وویل چې د 75 کلونو راهیسې هېواد یو ظالمانه نظام ته سپارل شوی چې له امله یې هېواد په پرله پسې اقتصادي بحران کې دی. هغه زیاته کړه چې د اشرافیه طبقې د ګټې لپاره پر ولس مالیې او د تېلو بیې لوړېږي او هېواد نور هم د پورونو لاندې راځي.