سترې محکمې له تورونو بري شوی دولتي کارکوونکی د بشپړ معاش او امتیازاتو حقدار وبللو

کوټه (وېب نیوز) د پاکستان سترې محکمې په یوه مهمه پرېکړه کې ویلي چې هغه دولتي کارکوونکی چې له تورونو څخه په عزت سره بري شي، د بشپړ معاش او ټولو پخوانیو امتیازاتو حق لري. د جسټس محمد علي مظهر په اته مخیز حکم کې راغلي چې د کارکوونکي د غیرحاضرۍ موده به د دندې د ترسره کولو وخت ګڼل کېږي. محکمې زیاته کړې چې اداري او جنايي مقدمې جلا بڼه لري او په یو وخت کې روانېدای شي. په پرېکړه کې دا هم ویل شوي چې د کارکوونکي له دندې د ګوښه کولو مخکې هغه ته د وضاحت او ځواب ورکولو فرصت نه ورکول د اساسي قانون خلاف عمل دی. سترې محکمې د خېبرپښتونخوا د تعلیم ریاست ته امر کړی چې په دوو میاشتو کې بېرته بحال شوي ښوونکي ته ټولې پخوانۍ مالي ګټې او امتیازات ورکړي.