ایران د هرمز تنګي له لارې پر تېرېدونکو بېړیو نوې فیس لګوي، دوستانه هېوادونو ته به ځانګړې اسانتیاوې ورکړي

بیجینګ (وېب نیوز) ایران اعلان کړی چې د هرمز تنګي له لارې پر تېرېدونکو بېړیو به نوې فیس ولګول شي، خو دوستانه هېوادونو ته به ځانګړې رعایتونه ورکړل شي. په چین کې د ایران سفیر عبدالرضا رحماني فضلي د ورلډ پیس فورم پر مهال وویل، ایران او عمان په ګډه د دې مهمې سمندري لارې لپاره د نوي اداري او امنیتي نظام پر جوړولو کار کوي. د هغه په وینا، دا فیس به د بېړیو د خوندي تګ راتګ، څارنې، د سمندري ترافیک د اغېزمن مدیریت او د چاپېریال ساتنې لپاره راټولېږي، او دا به د ټال مالیې په توګه ونه ګڼل شي. نوموړي زیاته کړه، ایران به هغو هېوادونو ته ځانګړې اسانتیاوې ورکړي چې په سختو شرایطو کې یې له تهران سره دوستانه اړیکې او ملاتړ ساتلی دی.