په بدلېدونکي نړیوال وضعیت کې د اقتصادي همکارۍ پراخول اړین دي: اسحاق ډار

اسلام‌آباد (وېب نیوز) د پاکستان مرستیال وزیراعظم او د بهرنیو چارو وزیر اسحاق ډار ویلي، د اوسني نړیوال وضعیت په رڼا کې د اقتصادي ملګرتیا او سوداګریزو همکاریو پراخول د وخت مهمه اړتیا ده. نوموړي د سوداګرو یوې غونډې ته په وینا کې وویل، د پاکستان او ترکیې تاریخي ورورګلوۍ اړیکې د دواړو هېوادونو ستره شتمني ده او حکومت د پانګونې لپاره د مناسب چاپېریال رامنځته کولو ته ژمن دی. هغه زیاته کړه چې د سوداګرۍ او پانګونې پر وړاندې د خنډونو د لرې کولو لپاره عملي ګامونه اخیستل کېږي او د معلوماتي ټکنالوژۍ، انرژۍ، کانونو او نورو برخو کې به د ترکي پانګونې هرکلی وشي.