اسراییلي استخباراتو د ایران د اټومي پروګرام په اړه د نتنیاهو د ادعا ملاتړ ونه کړ

تل ابیب (وېب نیوز) د اسراییلي رسنیو د راپورونو له مخې، د اسراییل استخباراتي ادارو د وزیراعظم بنیامین نتنیاهو هغه ادعا تایید نه کړه چې ګواکې د ایران اټومي پروګرام په بشپړه توګه له منځه وړل شوی دی. راپورونه وایي، د وزیراعظم دفتر پر موساد او پوځي استخباراتو فشار راوړی و چې د حکومت دریځ تایید کړي، خو استخباراتي چارواکو موجود شواهد ناکافي وبلل او د دې ادعا له تایید څخه یې ډډه وکړه. ویل کېږي چې د همدې موضوع پر سر د وزیراعظم دفتر او امنیتي ادارو ترمنځ اختلافات رامنځته شوي، او د امریکا د ولسمشر ډونلډ ټرمپ د ورته ادعا ملاتړ هم اسراییلي ادارو تر اوسه نه دی کړی.