له شارجه څخه کراچۍ ته د تلونکي ورکې شوې کارګو الوتکې پاتې شوني د بلوچستان له ساحل څخه وموندل شول

کوټه (وېب نیوز) له شارجه څخه کراچۍ ته د روانې خصوصي کارګو الوتکې پاتې شوني د بلوچستان د اوړماره ساحل ته نږدې له سمندر څخه ترلاسه شوي دي. چارواکو ویلي چې دغه پاتې شوني د اوړماره له ساحل څخه شاوخوا ۵۳ سمندري میله جنوب ته موندل شوي دي. د پاکستان سمندري ځواک او د پاکستان میریټایم سیکیورټي ادارې د دولسو ساعتونو څخه زیات ګډ لټون او ژغورنې عملیات ترسره کړل او د الوتکې درک یې ولګاوه. د عملې د غړو د موندلو، د نورو شواهدو د راټولولو او د پېښې د علت د معلومولو لپاره پلټنې او ژغورنیزې هڅې لا هم روانې دي.