وزیراعظم: عصري رېل پټلۍ به د اقتصاد او سوداګرۍ په وده کې مهم رول ولوبوي

کوټه (ویب نیوز): د پاکستان وزیراعظم شهباز شریف ویلي، چې عصري، اغېزمن او خوندي رېل پټلۍ به د هېواد د اقتصاد، سوداګرۍ او سیمه‌ییزو اړیکو په پیاوړتیا کې مهم رول ولوبوي. د هغه په مشرۍ د پاکستان رېلوې د بدلون پلان د پرمختګ ارزونې غونډه وشوه، چې پکې د اېم اېل ون او اېم اېل درې په ګډون پر بېلابېلو پروژو بریفنګ ورکړل شو. وزیراعظم د روهړي ـ ملتان د اېم اېل ون برخې د پرمختګ لپاره د هر اړخیزو وړاندیزونو د وړاندې کولو سپارښتنه وکړه. غونډې ته وویل شول چې د کراچۍ ـ روهړي د اېم اېل ون تفصیلي انجینري ډیزاین بشپړ شوی، د روهړي ـ نوکنډي د اېم اېل درې پروژه به د پي اېس ډي پي او برج فنانسنګ له لارې عملي کېږي، او د تهرکول ـ چهور ۱۱۲ کیلومتره رېل پټلۍ پروژه ۶۰ سلنه بشپړه شوې چې تمه ده د ۲۰۲۶ کال تر دسمبر پورې بشپړه شي.