د ولس غږ د بلوچستان د پرمختګ بنسټ دی؛ محمد خان طوراتمان خېل

کوټه (وېب نیوز) د پاکستان مسلم لیګ (ن) مخکښ او د بلوچستان صوبايي اسمبلۍ غړي حاجي محمد خان طوراتمان خېل ویلي، بلوچستان د پرمختګ نوي پړاو ته داخلېږي او حکومت د لومړیتوبونو پر بنسټ عملي کارونو ته ځانګړې پاملرنه کوي. نوموړي له بېلابېلو پلاوو سره د خبرو پر مهال وویل چې د بلوچستان پرمختګ د حکومت پر عملي اقداماتو او د ولس پر باور ولاړ دی، له همدې امله د حکومت پالیسۍ د خلکو د اړتیاوو او لومړیتوبونو له مخې جوړېږي. هغه وویل، د ولس غږ د حکومتي پرېکړو اصلي لارښود دی او حکومت هوډ لري چې بلوچستان د پرمختګ، روڼتیا او سولې په یوه پیاوړي مرکز بدل کړي. نوموړي زیاته کړه چې د صوبې ستونزې به یوازې په دفترونو او دوسیو کې نه حل کېږي، بلکې د خلکو ترمنځ به د هغوی ستونزې اورېدل کېږي او د حل لپاره به عملي ګامونه پورته کېږي. د ولسي شکایتونو د ژر تر ژره حل او اغېزمنې حساب ورکونې لپاره نوی نظام هم معرفي کېږي، څو په هره کچه د خدمتونو او چارو د ښه والي ډاډ ترلاسه شي. حاجي محمد خان طوراتمان خېل وویل چې د صوبې اصلي ځواک ولس دی او راتلونکې پرېکړې به د خلکو د غوښتنو او غږ له مخې کېږي. هغه وویل، یوازې هغه پرمختیايي پروژې به پیل کړي چې د خلکو په ژوند کې واقعي او مثبت بدلون رامنځته کړي. نوموړي ټینګار وکړ چې بلوچستان په یوه پیاوړي، باثباته او عصري صوبه بدلول یې دی، او که د ولس ملاتړ ورسره دوام ومومي، نو هغه اوږدمهاله بدلون به خامخا رامنځته کړي چې له ډېرې مودې راهیسې ورته اړتیا احساسېږي.