سیاسي مخالفت باید په دښمنۍ بدله نه شي، نواز شریف

کوټه (ویب نیوز) د مسلم لیګ (ن) مشر نواز شریف ویلي چې سیاسي مخالفت باید په دښمنۍ بدل نه شي، مسلم لیګ (ن) تل له خپلو سیاسي مخالفینو سره ښه چلند کړی دی. په مري کې د مسلم لیګ (ن) آزاد کشمیر د پارلماني ګوند غونډې ته په وینا کې نواز شریف د آزاد کشمیر په ټاکنو کې بریالیو نوماندانو ته مبارکي ورکړه او ویې ویل چې آزاد کشمیر ته باید د پرمختیا لپاره زیاتې بودیجې ورکړل شي. هغه وویل چې د مسلم لیګ (ن) د هغو غوره نوماندانو د ماتې عوامل هم باید وڅېړل شي چې په ټاکنو کې بریالي نه شول. نواز شریف وویل چې په دوو پړاوونو کې مسلم لیګ (ن) بریا ترلاسه کړې او ولس یو ځل بیا پر دې ګوند باور څرګند کړی، خو که مسلم لیګ (ن) د ولس خدمت او د هغوی ستونزې حل نه کړي، نو خلک به ناراضه شي. هغه وویل چې په آزاد کشمیر کې باید سړکونه او روغتونونه جوړ شي او د سیمې ماشومان هم د عصري زده کړو او ټکنالوژۍ اسانتیاوې غواړي. نوموړي زیاته کړه چې هېواد د پرمختګ پر لور روان دی او د وزیراعظم شهباز شریف هڅې پایلې ورکوي. نواز شریف وویل، لکه څنګه چې پنجاب پرمختګ کوي، همداسې باید آزاد کشمیر هم پرمختګ وکړي او د خلکو پر باور د زیان رسولو هېڅ ځای نشته. هغه وویل چې په تېر وخت کې د آزاد کشمیر حکومت د خلکو غوښتنې په سمه توګه نه دي پوره کړې، نو اوس باید د خلکو هوساینه او پرمختګ لومړیتوب وګرځول شي.