د پي ټي آی د بنسټګر شفا روغتون ته د لېږد په اړه د سترې محکمې ۷ مخیز لیکلی حکم خپور شو

اسلام‌اباد (وېب نیوز) سترې محکمې د پي ټي آی د بنسټګر عمران خان د روغتیا، درملنې او شفا انټرنېشنل روغتون ته د هغه د لېږد په اړه ۷ مخیز لیکلی حکم خپور کړی دی. محکمې حکم کړی چې عمران خان دې په دوو ورځو کې شفا انټرنېشنل روغتون ته ولېږدول شي او د هغه د درملنې لپاره دې د متخصصو ډاکټرانو طبي بورډ جوړ شي. د حکم له مخې، په طبي بورډ کې عمومي ډاکټر، عمومي جراح، د داخله ناروغیو متخصص، د سترګو متخصص او د زړه متخصص شامل وي، همدارنګه ډاکټر فیصل سلطان او ډاکټره عظمیٰ خان ته هم د طبي بورډ له کار سره د یوځای کېدو اجازه ورکړل شوې ده. سترې محکمې ویلي چې بندی کس د زندان دننه هم د انساني چلند او اړینو طبي اسانتیاوو حق لري. د شفا روغتون د درملنې لګښتونه به عمران خان یا د هغه کورنۍ ورکوي. محکمې حکومت ته امر کړی چې د عمران خان امنیت په روغتون کې یقیني کړي، له نیول کېدو راهیسې د هغه بشپړ طبي ریکارډ وړاندې کړي او د هغه پر ضد د ثبت شوو ټولو قضیو معلومات هم محکمې ته وسپاري. د حکم له مخې به عمران خان په اوونۍ کې یوه ورځ له خپلې کورنۍ سره لیدنه کوي او له خپلو زامنو سره به په اوونۍ کې دوه ځله د ټیلیفون له لارې خبرې کوي. خو تر راتلونکې اورېدنې پورې به د هغه د روغتیا او طبي راپورونو معلومات له رسنیو او عامو خلکو سره نه شریکېږي او د روغتون له مخې به هېڅ سیاسي غونډه نه کېږي. محکمې خبرداری ورکړی چې د دغو شرطونو د سرغړونې په صورت کې ورکړل شوی امتیاز بېرته اخیستل کېدای شي. د قضیې بله اورېدنه به د سپټمبر په ۱۶مه ترسره کېږي. بلخوا سرچینې وایي چې عمران خان ښایي نن شپه له اډیاله زندان څخه شفا روغتون ته ولېږدول شي او د هغه لپاره په روغتون کې امنیتي تدابیر بشپړ شوي دي. پولیس، ایف سي او رېنجرز به امنیت ساتي او د هغه د خونې څارنه به د زندان د ادارې کارکوونکي کوي.