په بلوچستان کې به د ټولو ضلعو د غیر معیاري کارونو پر ضد اقدام کېږي، میر سلیم خان خوسه

کوټه (ویب نیوز)د بلوچستان د مواصلاتو او تعمیراتو صوبایي وزیر میر سلیم خان خوسه ویلي چې د ولسي ستونزو حل او په خپلو انتخاباتي سیمو کې د پرمختیايي کارونو چټکتیا د حکومت له لومړیتوبونو څخه ده او ولس به نه ناهیلی کېږي. نوموړي له رسنیو سره په خبرو کې وویل چې د بلوچستان د پرمختګ او سوکالۍ لپاره صوبایي حکومت جدي اقدامات کوي او په ټولو ضلعو کې پرمختیايي کارونه روان دي. هغه خبرداری ورکړ چې که په هره ضلع کې غیر معیاري کار وموندل شو، نو د اړوند قراردادي او ایکسین پر ضد به قانوني اقدام کېږي. میر سلیم خوسه وویل، وزیراعلیٰ بلوچستان څرګنده لارښوونه کړې چې د صوبې د پرمختګ او سوکالۍ لپاره باید ټول په ګډه خپل رول ادا کړي. نوموړي زیاته کړه چې په خپلو انتخاباتي سیمو کې به روان پرمختیايي پروژې نورې هم چټکې شي، څو خلکو ته د بنسټیزو اسانتیاوو برابرول یقیني شي، په ځانګړي ډول سړکونو، مواصلاتي نظام او نورو اړینو پرمختیايي پروژو ته ځانګړې پاملرنه کېږي. هغه وویل چې د ولس دروازې ورته تل پرانیستې دي او خلک کولای شي خپلې ستونزې په مستقیم ډول ورسره شریکې کړي، چې د اړوندو ادارو په همکارۍ به یې د حل لپاره اغېزمن اقدامات ترسره شي. صوبایي وزیر ټینګار وکړ چې د ولسي خدمت لړۍ به روانه ساتي او د سیمې د پرمختګ او د خلکو د ستونزو د له منځه وړلو لپاره به ټول موجود وسایل کاروي.