پنجګور کې د امنیتي ځواکونو استخباراتي عملیات؛ ۵ ترهګر ووژل شول

پنجګور ( ویب ڈیسک ) د بلوچستان د پنجګور ولسوالۍ په کلي سوران سیمه کې امنیتي ځواکونو د استخباراتي معلوماتو پر بنسټ عملیات کړي چې په ترڅ کې یې د فتنۀ الهندستان ۵ ترهګر وژل شوي او ګڼ نور ژوبل شوي دي. د امنیتي سرچینو په وینا، عملیات د پټو معلوماتو پر بنسټ ترسره شول او د عصري ټکنالوژۍ په وسیله د ترهګرو پټنځایونه په نښه شول. سرچینې وايي، وژل شوي ترهګر پر موټرسایکلونو سپاره وو او د یوې سترې ترهګریزې حملې پلان یې جوړاوه. د عملیاتو پر مهال د ترهګرو له قبضې څخه عصري وسلې او مهمات، درې موټرې، دوه موټرسایکلونه او یوه ای اې ډي وسیله ترلاسه شوې، په داسې حال کې چې د یوې ناقانونه ګرځول شوې ډلې بیرغ هم امنیتي ځواکونو ترلاسه کړی دی. امنیتي سرچینو ادعا کړې چې وژل شوي ترهګر پر ځايي خلکو د لوټمارۍ، باج اخیستنې، د پیسو لپاره تښتونې او هدفي وژنو په ګډون په بېلابېلو جرمونو کې لاس لري او د ځانمرګو بریدونو پلانونه یې هم جوړول. امنیتي ځواکونو د سیمې د لا نورو احتمالي ترهګرو د موجودیت په صورت کې د عملیاتو او لټون لړۍ د دوام اعلان کړی دی.