د محمود خان اڅکزي د وینا ډېره برخه سانسور شوې، د خبرو اترو او د قانون د واک غوښتنه

اسلام اباد(وېب نیوز) د قومي اسمبلۍ د اپوزیشن مشر، د تحریک تحفظ آئین پاکستان مشر او د پښتونخوا ملي عوامي ګوند چیئرمېن محمود خان اڅکزي د قومي اسمبلۍ په غونډه کې سپیکر ته په خطاب کې وویل چې د افسوس خبره ده کله چې د سیاسي ګوندونو ترمنځ د خبرو اترو ښه فضا جوړه شي او د یو بل ته د نږدې کېدو امکانات زیات شي، نو د ځینو اقداماتو له امله دغه فضا بېرته خرابه شي، هغه د عمران خان د روغتیا په اړه د اندېښنې څرګندولو پر مهال وویل چې ټول پاکستان د هغه د روغتیا په اړه اندېښمن و او دا ویل کېدل چې د سپریم کورټ د حکم له مخې به هغه الشفاء روغتون ته انتقالېږي، خو د شپې په تیاره کې بل روغتون ته د هغه د انتقال او د هغه د خویندو او ډاکټرانو د الشفاء روغتون په یوه خونه کې د بندولو د راپورونو له امله ګڼې پوښتنې پیدا شوې دي، محمود خان اڅکزي د سرانان د پېښې په اړه وویل چې سرانان د ده له کلي څخه شاوخوا ۱۷ میله د کوټې پر لوري یو کوچنی بازار دی او هلته د شوې پېښې پر وړاندې د حکومت له خوا اغېزمن غبرګون ونه ښودل شو، هغه تور ولګاوه چې په سرانان کې شوې پېښه کېدای شي د حکومت دننه د موجودو «تورو پسونو» کار وي، نوموړي وویل چې د تحریک انصاف غړي د سپریم کورټ د احکامو د عملي کېدو غوښتنه کوي او که د عدالت حکمونه هم له پامه وغورځول شي، نو هېواد کوم لوري ته بیول کېږي، هغه له سپیکر څخه وغوښتل چې د ایوان د ساتونکي په توګه په دغو مسئلو کې خپل رول ادا کړي، محمود خان اڅکزي خبرداری ورکړ چې پاکستان دې د کورنۍ جګړې پر لور له بیولو ډډه وکړي او سیاسي ستونزې دې د خبرو اترو، اساسي قانون او د قانون د واک له لارې حل شي، نوموړي وویل چې د پوښتنو ساعت خپل اهمیت لري، خو د اوسني وضعیت په پام کې نیولو سره باید غړو ته د خپل دریځ د څرګندولو اجازه ورکړل شي، هغه دعوه وکړه چې د ده د وینا ډېره برخه سانسور شوې ده.