د بلوچستان وضعیت د اندېښنې وړ، حکومت ناکام دی، د اپوزېشن مشرانو څرګندونې

کوټه (ویب نیوز) بلوچستان اسمبلۍ اپوزېشن مشر میر یونس عزیز زهري، د اسمبلۍ غړو میر رحمت صالح بلوچ، میر زابد علي رېکي او مولانا هدایت الرحمن بلوچ ویلي چې د بلوچستان حالات ورځ تر بلې خرابېږي او حکومت او مقتدرې قوې په بشپړه توګه ناکامې ښکاري. هغوی له خبریالانو سره په جلا جلا خبرو کې وویل چې په صوبه کې د بې روزګارۍ، بدامنۍ او د سرحدونو د بندېدو له امله ولس له سختو ستونزو سره مخ دی. د اپوزېشن مشرانو وویل چې د بلوچستان خلکو ته د حقونو، عزت او انصاف له ورکولو پرته په صوبه کې سوله او پرمختګ ممکن نه دی. هغوی وویل چې د ولس په ملاتړ منتخب استازو ته د کار اجازه نه ورکول کېږي، په داسې حال کې چې د صوبې پر وسایلو واک لرونکې قوې د ولس له ستونزو بې پروا دي. دوی اعلان وکړ چې اپوزېشن به د بلوچستان د خلکو د حقونو د ترلاسه کولو، د ورکو کسانو د مسئلې، بدامنۍ او لوټمارۍ د ختمولو لپاره په هر فورم کې خپله مبارزه روانه ساتي. د اپوزېشن مشرانو وویل چې د بلوچستان د ستونزو حل په خبرو، مشورې او د اساسي قانون او ډیموکراسۍ په چوکاټ کې مبارزه کې دی. هغوی ژمنه وکړه چې د ظلم او جبر پر ضد، د ولسي حقونو د ترلاسه کولو او د بلوچستان د پرمختګ او سوکالۍ لپاره به د اسمبلۍ دننه او بهر خپل رول ته دوام ورکوي.