جیکب آباد کې ۱۹ افغان وګړو ته د ۱۰ تولې سپینو زرو او یو لک ۴۰ زره روپیو بېرته سپارلو خبر

جیکب آباد (اې اېن اېن) ـ په جیکب آباد کې د ۱۹ افغان وګړو څخه د ایکسائز پولیسو له لوري د مبینې رشوت اخیستو موضوع مخې ته له راتلو وروسته، د جیکب آباد اسسټنټ کمشنر نوید احمد د ایکسائز له کارکوونکو څخه ۱۰ تولې سپین زر او یو لک ۴۰ زره روپۍ نغدې بېرته ترلاسه کړې او افغان وګړو ته یې وسپارلې. اسسټنټ کمشنر نوید احمد ویلي چې له افغان وګړو څخه د مبینې رشوت اخیستو په تور به د ایکسائز پر دوو کارکوونکو قانوني کارروایي کېږي او هېڅکله به دا ونه زغمل شي چې له افغان وګړو څخه رشوت واخیستل شي او هغوی خوشې کړل شي. د نوموړي په وینا، په پېښه کې د ککړو کارکوونکو پر ضد به د قانون له مخې اقدام وشي. د یادونې وړ ده چې یوه ورځ وړاندې د جیکب آباد سي آی اې پولیسو له بلوچستان څخه کراچۍ ته پر لاره ۱۹ افغان وګړي د جیکب آباد له بای پاس څخه نیولي وو. افغان وګړو هغه مهال ادعا کړې وه چې تر دې مخکې ایکسائز پولیسو نیولي وو او له هغوی څخه یې ۱۰ تولې سپین زر او یو لک ۴۰ زره روپۍ اخیستې او وروسته یې خوشې کړي وو. د موضوع له څېړنې وروسته یاد سپین زر او نغدې پیسې بېرته ترلاسه او افغان وګړو ته وسپارل شوې. د سرچینو په وینا، د ایکسائز پولیسو پر دوو کارکوونکو د کارروایۍ امکان شته.