د کوټې په ګډون د بلوچستان په اوو رېنجونو کې د جرمونو پر ضد د صفر زغم تګلاره

کوټه (ویب نیوز) بلوچستان د پولیسو د انسپکټر جنرل محمد طاهر په لارښوونه، د کوټې په ګډون د صوبې په اوو رېنجونو کې د جرمي عناصرو پر ضد د صفر زغم تګلارې له مخې عملیات لا چټک شوي دي. د بلوچستان پولیسو د اعلان له مخې، د اشتهاري مجرمینو، له محکمې تښتېدلو تورنو او عادي جرمي عناصرو پر ضد ځانګړې مبارزه روانه ده او په تېرو درېیو اوونیو کې ۴۳ اشتهاري مجرمین، ۲۹۶ مفرور کسان او په بېلابېلو جرمونو کې ککړ ۴۶۶ تورن کسان نیول شوي، په داسې حال کې چې ۱۸ تښتول شوي کسان هم په خوندي توګه راخوشې شوي دي. د بېلابېلو عملیاتو پر مهال ۱۰۲ کسان د ناقانونه وسلو په تړاو نیول شوي او له هغوی څخه ۸۰ ریوالورونه او پستولونه، ۸ کلاشینکوفونه، ۶ شاټ ګنونه او ټوپکونه، ۶۸۲ مرمۍ او کارتوسونه او ۵۵ مېګزینونه ترلاسه شوي دي. پولیسو د نشه يي توکو د پلورونکو پر ضد هم پراخ عملیات کړي چې په ترڅ کې یې ۸۶ کسان نیول شوي او له هغوی څخه ۱۶۵ کیلو او ۳۸۸ ګرامه چرس، ۳ کیلو او ۸۵۴ ګرامه آیس شیشه، د ګټکې ۸ بوجۍ، ۱۵ ګرامه هیروئین، ۱۰۶ بوتله شراب او ۶۰ د بیر کینونه ترلاسه شوي دي. د عملیاتو پر مهال ۴ غلا شوي موټرونه، ۱۴ موټرسایکلونه او ۱۵ ګرځنده ټیلیفونونه هم ترلاسه شوي دي. د ټرافیک او قانون د عملي کولو په برخه کې د صوبې په کچه له ۴۵۷۶ موټرو څخه تورې ښیښې لرې شوې دي. د بلوچستان پولیسو ویاند ویلي چې په صوبه کې د سوله ییز چاپېریال د ټینګښت او د قانون د حاکمیت لپاره به د جرمي عناصرو پر ضد عملیات بې له ځنډه دوام ولري. د پولیسو مشر محمد طاهر افسرانو ته لارښوونه کړې چې له ولس سره د پولیسو د همکارۍ د زیاتولو، ښه چلند او متقابل درناوي ته ځانګړې پاملرنه وکړي او په تاڼو کې د مراجعینو ستونزې او ولسي شکایتونه پر وخت او په شفاف ډول حل کړي. هغه ویلي چې پولیس به د ولس د سر او مال د ساتنې او د جرمونو د له منځه وړلو لپاره له ټولو شته وسایلو څخه کار واخلي.