د مخالفو ګوندونو د ګډ محاذ جوړولو پرېکړه، پر حکومت د فشار راوړلو اعلان

اسلام اباد (ویب نیوز) د جمعیت علمای اسلام (ف) مشر مولانا فضل الرحمان په استوګنځي کې د مخالفو ګوندونو مهمه غونډه وشوه چې پکې په پارلمان کې پر حکومت د فشار راوړلو او د ګډ اپوزېسیون پر جوړولو موافقه وشوه. په غونډه کې د پاکستان تحریک انصاف مشرانو اسد قیصر، جنید اکبر، عامر ډوګر او شاهد خټک، د جمعیت علمای اسلام (ف) سناتور کامران مرتضیٰ، مولانا عبد الواسع او سناتور دلاور خان په ګډون نورو مشرانو هم ګډون کړی و. په غونډه کې د هېواد پر عمومي سیاسي وضعیت، امنيتي حالاتو او په پارلمان کې د اپوزېسیون پر رول خبرې وشوې. ګډونوالو په پارلمان کې د ګډ اپوزېسیون پر جوړولو موافقه وکړه او پرېکړه یې وکړه چې پر حکومت به سیاسي فشار زیاتوي. مولانا فضل الرحمان غونډې ته په وینا کې وویل چې د حکومت واکمني له ننګونې سره مخ ده او په هېواد کې امنیتي وضعیت خراب دی، په داسې حال کې چې ولس ته ناسم بیانیه وړاندې کېږي. هغه وویل چې ټول ګوندونه به له خپلو خپلو مشرانو سره مشورې وکړي او له هغې وروسته به په راتلونکې غونډه کې د ګډ اپوزېسیون راتلونکی تګلوری وروستی شي.