د سعودي عربستان پر ملکي تاسیساتو برید د یوه اسلامي هېواد پر خپلواکۍ برید دی، جمعیت نظریاتي

کوټه (وېب نیوز) ـ د جمعیت علما اسلام نظریاتي پاکستان مرکزي امیر مولانا عبدالقادر لوني، مرکزي عمومي منشي مولانا محمود الحسن قاسمي، مرکزي مرستیال امیر مولانا عبدالوههاب ډهیر، مولانا عبدالروف، سرپرست اعلیٰ مولانا ډاکټر شمس الهدیٰ، مرکزي د اطلاعاتو منشي سید حاجي عبدالستار شاه چشتي او مرکزي د مالیاتو منشي حاجي حیات الله کاکړ پر سعودي عربستان د مهمو ملکي تاسیساتو د برید په سختو ټکو کې غندنه کړې او ویلي یې دي چې د سعودي عربستان پر تاسیساتو برید نه یوازې د یوه ورور اسلامي هېواد پر خپلواکۍ برید دی، بلکې د سیمې د سولې، ثبات او نړیوالو قوانینو هم ښکاره سرغړونه ده. د جمعیت نظریاتي مشرانو وویل چې د سعودي عربستان له امنیت او ثبات سره د نړۍ د مسلمانانو احساسات تړلي دي او د حرمین شریفین پر خاوره هر ډول برید، پارونه یا ګواښ د ټولې اسلامي نړۍ لپاره د نه منلو وړ او د اندېښنې وړ دی. دوی وویل چې اسلامي هېوادونه اوس مهال د بهرنیو لاسوهنو، ناامنۍ او بې ثباتۍ له جدي ننګونو سره مخ دي او د مسلمانو هېوادونو پر ضد د مقابلې او ناامنۍ د رامنځته کولو هڅې د سیمې سولې ته ستر ګواښ دی. د جمعیت نظریاتي مشرانو له اسلامي هېوادونو وغوښتل چې له خپلو متقابلو اختلافاتو پورته شي او د مسلمانو هېوادونو پر ضد د دسیسو د مقابلې لپاره یو موټی شي، ځکه د اسلامي نړۍ بقا، سوله او امنیت په متقابل اتحاد او ګډې تګلارې کې نغښتی دی. دوی ټینګار وکړ چې د سعودي عربستان په ګډون د ټولو اسلامي هېوادونو د امنیت ساتنه ګډ مسؤلیت دی او په ځانګړي ډول د حرمین شریفین ساتنه، امن او امنیت د ټولې اسلامي نړۍ دیني او ملي فریضه ده.