قائم مقام صدر د سینیټ موبایل اپلېکېشن پرانیست، د پارلمان ډیجیټل بدلون یې مهم پرمختګ وباله

اسلام آباد (ویب نیوز) قائم مقام صدر پاکستان او د سینیټ چیئرمین سید یوسف رضا ګیلاني د سینیټ موبایل اپلېکېشن پرانیسته وکړه او دا یې د ډیجیټل ځواکمنتیا، د ادارې د کارکردګۍ د ښه والي او د لا شفاف، اغېزمن او ولس‌پال پارلماني نظام پر لور مهم ګام وباله. په پارلمان هاوس کې د اپلېکېشن د پرانیستې غونډې ته په وینا کې نوموړي وویل چې د سینیټ موبایل اپلېکېشن پیل د ۱۹۷۳م کال د سینیټ له جوړېدو وروسته د دې ادارې په سفر کې د ډیجیټل بدلون د نوي پړاو پیل دی. هغه وویل چې دا اقدام یوازې د یوه موبایل اپلېکېشن تر پرانیستلو محدود نه دی، بلکې د کار کولو د نوې طریقې، د فکر د نوي انداز او خلکو ته د خدمت د نوي اسلوب پیل دی. سید یوسف رضا ګیلاني وویل چې دا ډیجیټل اقدام به د سینیټ او د هغې د غړو پر کارکردګۍ او اداري چارو اوږدمهاله اغېز ولري او د داسې عصري پارلماني ادارې په جوړولو کې به مرسته وکړي چې د اوسني عصر له غوښتنو سره برابره وي. هغه وویل چې پخوا پارلماني او حکومتي چارې تر ډېره په دودیزو او لاسي طریقو ترسره کېدې، چې له امله یې د ولس خدمت پر ځای په اداري مراحلو ډېر وخت لګېده، خو اوس حالات بدل شوي او د ټیکنالوژۍ او نوښت منل د وخت مهمه اړتیا ده. قائم مقام صدر وویل چې د سینیټ موبایل اپلېکېشن د یوې ستراتیژیکې بدلون نښه ده او څرګندوي چې ایوان بالا به د عصري ټیکنالوژۍ له غوښتنو سره اوږه په اوږه حرکت کوي. هغه وویل چې د سینیټ سېکرټرېټ لا له وړاندې د ای-آفس نظام په بریالیتوب سره عملي کړی او ښې پایلې یې ترلاسه کړې دي، په داسې حال کې چې موبایل اپلېکېشن هم د سینیټ د پراخ ډیجیټل بدلون برخه ده چې موخه یې د وخت سپمول، د کارکردګۍ زیاتول او د غیرضروري مراحلو او تکرارونو له منځه وړل دي. هغه ټینګار وکړ چې ډیجیټل کول یوازې د اسانتیا برابرولو نوم نه دی، بلکې د ادارې د وړتیا او اغېزمنتیا د زیاتولو وسیله ده. نوموړي د پارلمان او ولس ترمنځ د اړیکو په پیاوړتیا کې د ټیکنالوژۍ رول هم مهم وباله او ویې ویل چې د سینیټ د رسمي وېبپاڼې او ټولنیزو رسنیو له لارې د پارلماني فعالیتونو په اړه پر وخت معلومات ورکول کېږي، د خلکو نظرونه ترلاسه کېږي او د ناسم معلوماتو د مخنیوي لپاره هم مرسته کېږي. هغه وویل چې د ډیجیټل ارشیفونو د پراختیا له امله کره پارلماني معلومات د پارلمان غړو، څېړونکو او ولس لپاره په اسانه توګه ترلاسه کېدای شي، چې له امله یې شفافیت زیاتېږي او پر ډیموکراتیکو ادارو د ولس باور پیاوړی کېږي. سید یوسف رضا ګیلاني وویل چې ډیجیټل بدلون یو دوامدار سفر دی او د سینیټ موبایل اپلېکېشن پیل د عصري، اغېزمن او ولس‌پال ایوان بالا پر لور مهم ګام دی. قائم مقام چیئرمین سینیټ سیدال خان ناصر وویل چې د سینیټ موبایل اپلېکېشن پیل د ادارې په پارلماني سفر کې مهم پړاو دی او د سینیټ د کاري طریقو د ستر بدلون څرګندونه کوي. هغه وویل چې دا اپلېکېشن یوازې یوه تخنیکي اسانتیا نه ده، بلکې د سینیټ د داخلي نظام د عصري کولو د پراخو هڅو برخه ده. وفاقي وزیر د پارلماني چارو ډاکټر طارق فضل چودري وویل چې د سینیټ موبایل اپلېکېشن پیل د پارلمان د کاري طریقو او له غړو او ولس سره د اړیکو د عصري کولو پر لور مهم ګام دی. نوموړي وویل چې د عصري پارلمان لپاره یوازې ښه قانون جوړونه کافي نه ده، بلکې داسې عصري نظامونه هم اړین دي چې له لارې یې پارلماني چارې په اغېزمن ډول ترسره، منظمې، ثبت او ولس ته ورسول شي. د اطلاعاتي ټیکنالوژۍ او ټیلی‌کمیونیکېشن وفاقي وزیرې شزا فاطمه خواجه د پارلمان د ډیجیټل کولو هڅې وستایلې او ویې ویل چې ډیجیټل بدلون به د ادارې کارکردګي، شفافیت او د ولس غبرګون ښه کړي. هغې وویل چې د حکومت د ډیجیټل بدلون اجنډا ډیجیټل اقتصاد، ډیجیټل ټولنه او ډیجیټل حکومتولي رانغاړي او د ټولو دولتي او ولسي ادارو ډیجیټل بدلون د حکومت د اجنډا برخه ده. هغې زیاته کړه چې تېر کال د سینیټ او قومي اسمبلۍ له خوا د ډیجیټل نیشن پاکستان قانون تصویب شو، چې له مخې یې د پاکستان ډیجیټل اتهارټي جوړه شوه. د سینیټ سېکرټري سید حسنین حیدر ګډونوالو ته د «سینیټ آف پاکستان» اپلېکېشن د موخو او ځانګړتیاوو په اړه معلومات ورکړل او ویې ویل چې دا اپلېکېشن د سینیټ د آی ټي څانګې له خوا جوړ شوی او د پارلماني معلوماتو د لا اغېزمن او پر وخت رسولو لپاره به مرسته وکړي.