سورینج کان حادثے د پلټنې کمېټه دې له سره جوړه شي

کوټه (ویب نیوز) د بلوچستان ملي کارګر فدراسیون د سورینج کان له پېښې وروسته د جوړې شوې عدالتي پلټنې کمېټې پر تحقیقاتو سختې اندېښنې څرګندې کړې او د بلوچستان له حکومت او د کانونو له محکمې یې غوښتنه کړې چې کمېټه دې له سره جوړه او په بشپړه توګه دې شفافې، خپلواکې او بې پرې پلټنې ترسره شي. فدراسیون ویلي، اندېښمنوونکی حالت دا دی چې د پېښې د اصلي مسوولینو د معلومولو پر ځای د هغو کسانو پر لوري د پلټنو هڅه کېږي چې له پېښې سره مستقیم تړاو نه لري، په داسې حال کې چې د کان د مالک، اجاره دار، قراردادي او نورو اړوندو مسوولینو رول له پامه غورځول کېږي. په بیان کې ویل شوي چې د یوه غیر اړوند کس قرباني کول به د وژل شویو کان کیندونکو او د هغوی له کورنیو سره لویه بې‌انصافي وي. حکومت باید د خوندیتوب د قوانینو د سرغړونې، نیمګړو انتظاماتو او د پېښې د اصلي لاملونو په اړه حقیقتونه روښانه کړي. فدراسیون غوښتنه کړې چې د پلټنې په کمېټه کې دې بې پرې، وړ او صادق کسان شامل شي او د کان د مالک، اجاره دار، قراردادي او اړوندو دولتي چارواکو په ګډون د ټولو مسوولینو رول دې په تفصیل وڅېړل شي. هر څوک چې د پېښې مسوول ثابت شي، باید د قانون له مخې سخته سزا ورکړل شي، ځکه شفافې پلټنې، د اصلي مسوولینو ټاکل او قانوني اقدام د وژل شویو کان کیندونکو له کورنیو سره د ریښتیني انصاف او د ورته پېښو د مخنیوي تر ټولو اغېزمنه لاره ده.