په کوټه کې د وړو او غټو غوښو بیې اسمان ته ختلې؛ د نرخونو د کنټرول کمېټې فعالیت صفر

کوټه (ویب نیوز)په کوټه ښار کې د وړې او غټې غوښې د بیو پرله‌پسې زیاتوالي د خلکو ستونزې نورې هم زیاتې کړې دي، په داسې حال کې چې د نرخونو د کنټرول کمېټې او ضلعي انتظامیې له خوا د ټاکل شوو نرخونو د عملي کولو په برخه کې د مبینې ناکامۍ له امله خلک اړ دي چې غوښه په لوړو بیو وپېري. د ښار په بېلابېلو سیمو، په ځانګړي ډول عالمو چوک، کانسي روډ، ګلمنډي چوک، ډبل روډ او جوائنټ روډ کې وړې غوښې بیه له ۲۲۰۰ څخه تر ۲۵۰۰ روپیو فی کیلو پورې رسېدلې، په داسې حال کې چې بې هډوکي غټه غوښه له ۱۳۰۰ څخه تر ۱۵۰۰ روپیو او له هډوکي سره غټه غوښه له ۱۱۰۰ څخه تر ۱۳۰۰ روپیو فی کیلو پلورل کېږي. ښاریان وایي چې د غوښې د بیو زیاتوالي د ګرانۍ له امله د ستونزو سره مخ خلکو بار نور هم دروند کړی او د محدود عاید لرونکو کورنیو لپاره د غوښې اخیستل ورځ تر بلې ستونزمن کېږي. د ولسي حلقو په وینا، که څه هم په بازارونو کې د سرکاري نرخونو لېستونه لګېدلي، خو یو شمېر دوکانداران په مبینه توګه د خپلې خوښې نرخونه اخلي او د نرخونو د کنټرول کمېټه د دې وضعیت په مخنیوي کې اغېزمن رول نه لوبوي. ښاریانو له لوړپوړو چارواکو غوښتنه کړې چې د نرخونو د کنټرول کمېټه فعاله کړي، په ټولو بازارونو کې د غوښې بیې په منظم ډول وڅاري، د ګران‌فروشۍ کوونکو پر وړاندې بې توپیره قانوني اقدام وکړي او خلکو ته په ټاکل شوو نرخونو د غوښې د برابرولو ډاډ ورکړي. د دوی په وینا، یوازې د نرخونو لېستونه خپرول بسنه نه کوي، بلکې په بازارونو کې منظمې پلټنې او عملي څارنه ضروري ده، څو عام خلک له من ماني بیو او اضافي مالي بوج څخه وژغورل شي.