بی ایم ایف د خبریالانو اغېزمن غږ ګرځېدلی، پښتونخوا نېپ انجینرانو فورم

کوټه (ویب نیوز)د پښتونخوا ملي عوامي ګوند د انجینرانو او معمارانو فورم د بلوچستان میډیا فورم د لومړۍ مرکزي غونډې د ترسره کېدو هرکلی کړی او مرکزي مشر قیوم بلوچ، عمومي منشي الله داد رند او ټولو مرکزي او ډویژنل چارواکو او غړو ته یې مبارکي ویلې ده. د پښتونخوا نېپ انجینرانو او معمارانو فورم مرکزي همغږي کوونکي انجینر اسلم مندوخېل په خپل بیان کې ویلي چې خبریالان د ټولنې یو مهم او حساس قشر دی چې د ولس ستونزې، ټولنیزې مسئلې او د حکومتي ادارو فعالیتونه رابرسېره کوي او د ولس او دولتي ادارو ترمنځ د اړیکې مهمه وسیله ده. هغه وویل چې په بلوچستان کې، چې له بېلابېلو ستونزو سره مخ دی، د خبریالانو مسؤلیتونه لا زیات مهم دي او سیمه‌ییز خبریالان د لرې پرتو سیمو د خلکو ستونزې، د تعلیم، روغتیا، روزګار، پرمختیايي پروژو او بنسټیزو اسانتیاوو مسئلې رابرسېره کوي، خو دوی د خپلو مسلکي دندو پر مهال له ګڼو ستونزو سره هم مخ دي. نوموړي وویل چې د بلوچستان میډیا فورم جوړېدل د خبریالانو د اتحاد، متقابلې همغږۍ، د مسلکي حقونو د ساتنې او د سیمه‌ییزې خبریالۍ د ودې لپاره مهم ګام دی. هغه هیله څرګنده کړه چې د فورم مشرتابه به د خبریالانو د ستونزو د هواري، د سیمه‌ییزو ورځپاڼو او میډیا کارکوونکو د حقونو د ساتنې او د مثبتو ژورنالیستیکو ارزښتونو د ودې لپاره خپلې هڅې روانې وساتي.