د نویو صوبو وروستۍ پرېکړه به پارلمان کوي، د مسلم لیګ ن دریځ به د پرېکړې پر مهال څرګند شي، رانا ثناءالله

کوټه (ویب نیوز) د لومړي وزیر سلاکار او سناتور رانا ثناءالله ویلي چې د نویو صوبو د جوړېدو وروستۍ پرېکړه به پارلمان کوي، ځکه که دی پخپله د صوبو د جوړېدو یا نه جوړېدو اعلان وکړي، نو دا به د پارلمان له پامه غورځول وي. هغه وویل چې پاکستان پیپلز ګوند د نویو صوبو په اړه خپل دریځ روښانه کړی، خو مسلم لیګ ن به چې کله په دې اړه پرېکړه وکړي، دریځ به یې د ټولو مخې ته وي. نوموړي وویل، که د ټولپوښتنې پرېکړه هم وشي، د هغې اجازه باید پارلمان ورکړي او د نویو صوبو موضوع باید په پارلمان کې وڅېړل شي، څو ټول سیاسي ګوندونه خپل دریځ څرګند کړي.