په بلوچستان کې د فتنه الهندو پر ضد عملیات، د قوماندان په ګډون ۹ ترهګر ووژل شول

کوټه(ویب نیوز) په بلوچستان کې امنیتي ځواکونو او قانون پلي کوونکو ادارو د فتنه الهندو پر ضد په دوو بېلابېلو عملیاتو کې د یوه قوماندان په ګډون ۹ ادعا شوي ترهګر وژلي دي. امنیتي سرچینې وايي، په مستونګ کې د عملیاتو پر مهال د فتنه الهندو یوه موټر د کواډ کاپټر له لارې په نښه شو چې پکې د نقیب په نوم د قوماندان په ګډون درې ترهګر ووژل شول او موټر یې په بشپړه توګه ویجاړ شو. بلخوا د پشین د سرانان په سیمه کې د ترهګرۍ ضد څانګې (سي ټي ډي) د استخباراتي معلوماتو پر بنسټ عملیات وکړل چې د ډزو په تبادله کې شپږ ادعا شوي ترهګر ووژل شول او څلور امنیتي سرتېري ټپیان شول. د سي ټي ډي ویاند په وینا، وژل شوي کسان له یوې منع شوې ډلې سره تړاو لري او له هغوی څخه وسلې او چاودېدونکي توکي هم ترلاسه شوي دي. د بلوچستان د کورنیو چارو مرستیال بابر یوسفزي او د پلان جوړونې او پراختیا صوبايي وزیر میر ظهور بلیدي عملیات وستایل او ویې ویل چې ترهګرو ته به د بلوچستان د امن د ګډوډولو اجازه ورنه کړل شي او د ترهګرۍ تر بشپړ له منځه وړلو پورې به عملیات دوام ولري.