کوټه (سید سردار محمد خندایي)
د مظلوم عوامي تحریک د مرکزي، ولایتي او ولسوالۍ د مشرانو یوه مهمه ګډه غونډه په کوټه کې د مرکزي ولسمشر عباس خان دراني په مشرۍ ترسره شوه، چې پکې د ګوند مرکزي، ولایتي او ولسوالۍ مسؤلینو په بشپړ ډول ګډون وکړ.
په غونډه کې له مشورې وروسته، د اسلم خان اچګزي نوم د ولایتي مشر د څوکۍ لپاره وړاندې شو، چې د ټولو ګډونوالو لخوا په متفقه توګه تصویب شو او هغه د مظلوم عوامي تحریک بلوچستان د ولایتي مشر په توګه وټاکل شو.
په دې غونډه کې د مرکزي مشر عباس خان دراني په وينا، اسلم خان اڅګزي تل ګوند ته مخلص، نه ستړي کېدونکي او ارزښتناک خدمتونه کړي دي. هغه په تیرو وختونو کې د ولایتي عمومي منشي په توګه هم خپلې دندې په بریالیتوب سره ترسره کړې دي. هغه هیله څرګنده کړه چې اسلم خان اڅګزي به د خپلو مهارتونو، تجربې او مشرتابه رول له لارې د ګوند په پیاوړي او فعالولو کې مهم رول ولوبوي.
د غونډې ګډونوالو نوي ټاکل شوي ولایتي مشر اسلم خان اڅګزي ته د زړه له کومې مبارکي وویله او د هغه لپاره یې نیکې هیلې څرګندې کړې.
