اپوزېسیون د بلوچستان د حکومت د سمدستي استعفا او د هېواد په کچه د احتجاجي تحریک اعلان وکړ

اسلام‌آباد/کوټه (نوې ژوند وېب نیوز)د پاکستان د اساسي قانون د ساتنې غورځنګ او نورو اپوزېسیون ګوندونو د بلوچستان د خراب امنیتي وضعیت، د زیارت د خونړۍ پېښې او وروستیو ناامنۍ په اړه ژوره اندېښنه څرګنده کړې او د بلوچستان د حکومت د سمدستي استعفا غوښتنه یې کړې ده. په اسلام‌آباد کې د محمود خان اڅکزي په مشرۍ د اپوزېسیون په غونډه کې پرېکړه وشوه چې د هېواد په کچه به احتجاجي تحریک پیلوي، بلوچستان او آزاد کشمیر ته به ګډ پلاوی استوي او د اغېزمنو کورنیو سره به د یووالي څرګندونه کوي. محمود خان اڅکزي وویل چې د دوی ولسي تحریک به له بلوچستان، په ځانګړي ډول د زیارت له سانحې څخه پیل کېږي او د اپوزېسیون مشران به کوټې ته ولاړ شي، د شهیدانو له کورنیو او د احتجاج له ګډونوالو سره به وویني. ګډونوالو د زیارت، هنه اوړک او نورو پېښو د خپلواکو او بې پرې پلټنو، د امنیتي او اداري ناکامیو د حساب ورکولو، د سیاسي بندیانو او بې درکه کسانو د مسئلو د حل، د اساسي قانون د واکمنۍ، د عدلیې او رسنیو د ازادۍ او د سیاسي خبرو اترو له لارې د ستونزو د حل غوښتنه وکړه. د اپوزېسیون مشرانو اعلان وکړ چې ډېر ژر به بلوچستان او آزاد کشمیر ته ګډ سفر وکړي او د خلکو غوښتنې به په پارلمان او نورو ملي فورمونو کې په کلکه راپورته کړي.