د لومړي وزیر شهباز شریف او د بېلاروس د انرژۍ وزیر لیدنه، د پرېکړو پر عملي کولو هوکړه

اسلام اباد (وېب نيوز) لومړي وزیر شهباز شریف د بېلاروس د انرژۍ له وزیر ډزینس ماروز سره لیدنه وکړه، چې په ترڅ کې یې د پاکستان او بېلاروس ترمنځ د سوداګرۍ، صنعت، کرنې، بانکدارۍ، کاري ځواک، ترانسپورټ او انرژۍ په ګډون په بېلابېلو برخو کې د همکاریو ارزونه وشوه. لومړي وزیر د ګډ وزارتي کمېسیون د نهمې غونډې له پرمختګونو خوښي څرګنده کړه او ویې ویل چې د کمېسیون پرېکړې به د دواړو هېوادونو مخ پر زیاتېدونکې ملګرتیا لا پیاوړې کړي. دواړو مشرانو د لوړې کچې د مشرتابه له خوا د شوې پرېکړو د عملي کولو لپاره د دوه اړخیزو اړیکو او همکاریو د لا زیاتولو هوډ څرګند کړ. لومړي وزیر د بېلاروس د انرژۍ وزیر او د هغه پلاوي ته ښه راغلاست ووایه او د ولسمشر الکساندر لوکاشینکو لپاره یې نېکې هیلې وړاندې کړې، په داسې حال کې چې د بېلاروس د انرژۍ وزیر د تود هرکلي له امله له لومړي وزیر څخه مننه وکړه.