کوټه کې د چای پیاله ۱۰۰ روپیو ته ورسېده، ښاریانو د من‌مانه بیو پر ضد احتجاج وکړ

کوټه(ویب نیوز)د بلوچستان په مرکز کوټه کې د چای په بیه کې ناڅاپي او د ښاریانو په وینا د من‌مانه زیاتوالي له امله خلکو اندېښنه څرګنده کړې ده. د ښار او شاوخوا سیمو په بېلابېلو هوټلونو او چایخانو کې د یوه پیاله چای بیه له ۸۰ څخه ۱۰۰ روپیو ته لوړه شوې، چې له امله یې ښاریانو له ضلعي انتظامیې څخه د سمدستي نوټس اخیستو او د ګران‌فروشۍ پر ضد د کارروایۍ غوښتنه کړې ده. د ښاریانو په وینا، په ګڼو سیمو کې هوټل‌والو د یوه پیاله چای بیه په ناڅاپي ډول ۲۰ روپۍ لوړه کړې ده. دوی وايي، چای د ورځني ژوند یوه عامه اړتیا ده او په بیه کې دومره ناڅاپي زیاتوالی پر عامو مصرفوونکو اضافي مالي بار اچوي. مصرفوونکي وايي، د چای د بیو له لوړوالي سربېره په ځینو هوټلونو کې سرکاري نرخ‌نامه هم په څرګند ځای کې نه لګېږي، چې له امله یې مشتریان د بل ورکولو پر مهال له اضافي پیسو ورکولو سره مخ کېږي. ښاریانو غوښتنه کړې چې ضلعي انتظامیه دې د ټولو هوټلونو، چایخانو او اړوندو کاروباري مرکزونو بیې وڅېړي او د سرکاري نرخونو د سرغړونکو پر ضد دې د قانون له مخې کارروایي وکړي. ښاریانو په احتجاج کې وویل چې د یوه پیاله چای په بیه کې ۲۰ روپۍ زیاتوالی په داسې وخت کې چې عام ولس له وړاندې د ګرانۍ له ستونزو سره مخ دی، د پام وړ اضافي بار دی. د دوی په وینا، هغه کسان چې هره ورځ په هوټلونو کې چای څښي، د هرې پیالې ۲۰ روپۍ اضافي لګښت په میاشتني بودیجه کې د پام وړ زیاتوالی راوستلی شي. مصرفوونکو وویل، که د چای په بیه کې د زیاتوالي کومه واقعي وجه موجوده وي، نو باید د اړوندې انتظامیې او د نرخونو د کنټرول ادارې له لوري وڅېړل شي او هوټل‌والو ته باید د خپلې خوښې له مخې د بیو ټاکلو اجازه ورنه کړل شي. ښاریانو وویل، په کوټه کې د خوراکي توکو او ورځني استعمال د نورو شیانو بیې هم له وړاندې د خلکو لپاره ستونزې جوړوي، نو د چای د یوې پیالې بیه له ۸۰ څخه ۱۰۰ روپیو ته رسول د ولس ستونزې لا زیاتوي. دوی له ضلعي انتظامیې غوښتنه کړې چې په ټولو هوټلونو او چایخانو کې د سرکاري نرخ‌نامو څارنه وکړي، د ټاکل شویو بیو عملي کېدل یقیني کړي، نرخ‌نامه په څرګند ځای کې د لګولو پابندي عملي کړي او د سرغړونکو هوټل‌والو پر ضد دې د جرمانې او نورو قانوني اقداماتو په ګډون کارروایي وکړي. ښاریانو له کوټې ډپټي کمشنر او د نرخونو د کنټرول اړوندو چارواکو څخه غوښتنه کړې چې سمدستي دې نوټس واخلي او په ښار کې د چای او نورو خوراکي توکو د بیو د څارنې اغېزمن نظام رامنځته کړي. د دوی په وینا، انتظامیه باید یوازې د شکایتونو تر ترلاسه کېدو انتظار ونه کړي، بلکې په بازارونو او هوټلونو کې دې ناڅاپي معاینې ترسره کړي، څو مصرفوونکي له ناجایزه بیو او ګران‌فروشۍ څخه خوندي شي. ولس ټینګار کړی چې دوی د مناسبو بیو پر سر د معیاري توکو رسولو او په کاروباري چارو کې روڼتیا غواړي او هېڅ سوداګر یا هوټل‌وال باید د خپلې خوښې له مخې بیې لوړې نه کړي.